Verbum supérnum pródiens, Nec Patris linquens déxteram, Ad opus suum éxiens, Venit ad vitae vésperam. In mortem a discipulo Suis tradéndus aémulis, Prius in vitae férculo, Se trádidit discipulis. Quibus sub bina spécie. Carnem dedit et sánguinem: Ut dúplicis substántiae Totum cibáret hóminem. Se nascens dedit sócium, Convéscens in edúlium, Se móriens in prétium, Se regnans dat in praémium. O salutáris hóstia, Quae caeli pandis óstium: Bella premunt hostilia, Da robur, fer auxilium. Uni Trinóque Dómino Sit sempitérna glória: Qui vitam sine término Nobis donet in pátria. Amen.